نوازشریف کی صحت میں بہتری آنے لگی، پلیٹ لیٹس 55ہزارہوگئے

لاہور: سابق وزیر اعظم نواز شریف کی صحت میں بہتری آنے لگی ہے ، سروسز اسپتال لاہورمیں زیر علاج نوازشریف کے پلیٹ لیٹس بڑھ گئے، تعداد 55ہزارہوچکی ہے جس کے بعد وہ سفر کے قابل ہوگئے ہیں۔

لاہور کے سروسز اسپتال میں 11 روز سے زیر علاج سابق وزیراعظم نواز شریف کی حالت میں بہتری آنا شروع ہوگئی ہے اور ان کے پلیٹ لیٹس کی تعداد میں بھی اضافہ ہوا ہے۔ میڈیکل بورڈ نے سفر کے لیے پلیٹ لیٹس 50 ہزار سے زائد ہونا ضروری قرار دیا تھا۔

ذرایع کا کہنا ہے کہ نواز شریف کے پلیٹ لیٹس کی تعداد 55 ہزار ہو گئی ہے،نواز شریف سفر کریں گے یا نہیں، اس کا فیصلہ میڈیکل بورڈ سے مشاورت کے بعد ہوگا۔

نواز شریف کے معالج ڈاکٹر عدنان نے میڈیا سے غیر رسمی گفتگو کرتے ہوئے کہا کہ نواز شریف کے پلیٹ لیٹس کا مسئلہ بہتری کی طرف گامزن ہے جو اچھی پیش رفت ہے۔ انہوں نے کہا کہ سابق وزیراعظم کے دل اور گردوں کا مسئلہ ہے جس کا علاج ہنوز جاری ہے، انہوں نے نواز شریف کے لیے دعا کی اپیل کی۔

میڈیکل بورڈ کے مطابق میڈیکل بورڈ روزانہ کی بنیاد پر نواز شریف کا طبی معائنہ کر رہا ہے، 12 رکنی میڈیکل بورڈ آج بھی نوازشریف کا طبی معائنہ کرے گا جس کے بعد مزید ٹیسٹ تجویز کیے جائیں گے۔

اس سے قبل سربراہ میڈیکل بورڈ پروفیسرڈاکٹرمحمودایاز نے میڈیا سے غیر رسمی گفتگو میں کہا تھاکہ نواز شریف کے پلیٹ لیٹس 35 ہزار تھے، جو آہستہ آہستہ روزانہ کی بنیاد پر 5 سے 6 ہزار بڑھیں گے، ان کا کہنا تھا کہ پلیٹ لیٹس اب قدرتی طور پر بڑھیں گے،مزید ٹیسٹ کیلئے سمپل لیبارٹری بجھوادیئے گئے ہیں۔

پروفیسر ڈاکٹر محمودایازکا مزید کہنا تھا کہ نوازشریف کا بلڈشوگر بدستور زیادہ ہے، میڈیکل بورڈ کی تمام تر توجہ بلڈ شوگر نارمل کرنے پرمرکوز ہے، نہار منہ بلڈ شوگر لیول 200 سے زائد ہے، بلڈ شوگر لیول معمول پر آنے تک پیٹ اسکین ٹیسٹ نہیں ہوسکتا، پیٹ اسکین نہ ہونے سے پلیٹ لیٹس کی کمی کی تشخیص نہیں ہوسکی، نوازشریف کےبلڈپریشرکو بھی نارمل رکھنے کیلئے ادویات جاری ہیں۔